Канон воскресный глас 1

Тропарь воскресен, глас 1:

Ка́мени запеча́тану от иуде́й и во́ином стрегу́щим Пречи́стое Те́ло Твое́, / воскре́сл еси́ тридне́вный, Спа́се, да́руяй ми́рови жизнь. Сего́ ра́ди Си́лы Небе́сныя вопия́ху Ти, Жизнода́вче: сла́ва Воскресе́нию Твоему́, Христе́, сла́ва Ца́рствию Твоему́, сла́ва смотре́нию Твоему́, еди́не Человеколю́бче.

Богородичен: Гаврии́лу, веща́вшу Тебе́, Де́во, ра́дуйся, со гла́сом воплоща́шеся всех Влады́ка, в Тебе́, Святе́м Киво́те, я́коже рече́ пра́ведный Дави́д; яви́лася еси́ ши́ршая небе́с, поноси́вши Зижди́теля Твоего́. Сла́ва Все́льшемуся в Тя, сла́ва Проше́дшему из Тебе́, слава Свободи́вшему нас рождество́м Твои́м.

Канон воскресен, глас 1.

Песнь 1.

Ирмос: Твоя́ победи́тельная десни́ца Боголе́пно в кре́пости просла́вися: та бо, Безсме́ртне, я́ко всемогу́щая, проти́вныя сотре́, Изра́ильтяном путь глубины́ новосоде́лавшая.

Припев: Сла́ва, Го́споди, свято́му Воскресе́нию Твоему́.

И́же рука́ма пречи́стыма от пе́рсти богоде́тельне испе́рва созда́в мя, ру́це распросте́рл еси́ на кресте́, от земли́ взыва́я тле́нное мое́ те́ло, е́же от Де́вы прия́л еси́.

Умерщвле́ние подъя́л еси́ мене́ ра́ди, и ду́шу сме́рти пре́дал еси́, И́же вдохнове́нием боже́ственным ду́шу ми вложи́вый, и отреши́в ве́чных уз, и совоскреси́в нетле́нием просла́вил еси́.

Богородичен: Ра́дуйся, благода́ти исто́чниче, ра́дуйся ле́ствице, и две́ре небе́сная, ра́дуйся све́щнице, и ру́чко злата́я, и горо́ несеко́мая, Я́же Жизнода́вца Христа́ мíрови ро́ждшая.

Песнь 3.

Ирмос: Еди́не ве́дый челове́ческаго существа́ не́мощь и ми́лостивно в не вообра́жся, препоя́ши мя с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Бог Сый мне, Бла́же, па́дшаго уще́дрил еси́, и сни́ти ко мне благоволи́в, возне́сл мя еси́ распя́тием, е́же вопи́ти Тебе́, Святы́й: Хра́ме одушевле́нный неизрече́нныя Твоея́ сла́вы, Человеколю́бче.

Живо́т ипоста́сный Христе́ сый, в истле́вша мя, я́ко Милосе́рдый Бог, обо́лкся, в персть сме́ртную соше́д, Влады́ко, сме́ртную держа́ву разруши́л еси́, и мертв тридне́вен воскре́с, в нетле́ние мя обле́кл еси́.

Богородичен: Бо́га заче́нши во чре́ве, Де́во, Ду́хом Пресвяты́м, пребыла́ еси́ неопали́ма, поне́же Тя купина́ законополо́жнику Моисе́ю, пали́мую нежего́мо, я́ве предвозвести́, огнь нестерпи́мый прие́мшую.

Седален, глас 1:

Гроб Твой, Спа́се, во́ини стрегу́щии, ме́ртвии от облиста́ния я́вльшагося а́нгела бы́ша, пропове́дающа жена́м воскресе́ние. Тебе́ сла́вим тли потреби́теля, Тебе́ припа́даем, Воскре́сшему из гро́ба, и Еди́ному Бо́гу на́шему.

Песнь 4.

Ирмос: Го́ру Тя благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во Спасе́ние на́ше и обновле́ние.

Кто сей Спас и́же из Едо́ма и́сходя, вене́ц нося́ терно́вен, очервле́нну ри́зу имы́й, на дре́ве ви́ся? Изра́илев есть Сей Святы́й, во Спасе́ние на́ше и обновле́ние.

Ви́дите лю́дие непокори́вии, и устыди́теся: Его́же бо я́ко злоде́я вы вознести́ на крест у Пила́та испроси́сте умовре́дне, сме́рти разруши́в си́лу, боголе́пно воскре́с из гро́ба.

Богородичен: Дре́во Тя, Де́во, жи́зни ве́мы: не бо сне́ди плод смертоно́сный челове́ком из Тебе́ прозябе́, но живота́ присносу́щнаго наслажде́ние, во Спасе́ние нас пою́щих Тя.

Песнь 5.

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия, правосла́вно пою́щих Тя.

Па́стыря овца́м вели́каго и Го́спода, иуде́и дре́вом кре́стным умертви́ша: / но Той я́ко о́вцы, ме́ртвыя, во а́де погребе́нныя, держа́вы сме́ртныя изба́ви.

Кресто́м Твои́м мир благовести́в, и пропове́дав пле́нным, Спа́се мой, оставле́ние, держа́ву иму́щаго посрами́л еси́, Христе:́ на́га, обнища́вша показа́вый Боже́ственным воста́нием Твои́м.

Богородичен: Проше́ния ве́рно прося́щих, Всепе́тая, не пре́зри: но приими́, и сия́ доноша́й Сы́ну Твоему́, Пречи́стая, Бо́гу Еди́ному Благоде́телю, Тебе́ бо Предста́тельницу стяжа́хом.

Песнь 6.

Ирмос: Обы́де нас после́дняя бе́здна, несть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же наш, Ты бо кре́пость немощству́ющих и исправле́ние.

Согреше́нием первозда́ннаго, Го́споди, лю́те уязви́хомся, ра́ною же исцели́хомся Твое́ю, е́юже за ны уязви́лся еси́, Христе́: Ты бо кре́пость немощству́ющих и исправле́ние.

Возве́л ны еси́ из а́да, Го́споди, ки́та уби́в всея́дца, Всеси́льне, Твое́ю держа́вою низложи́в того́ си́лу: Ты бо Живо́т, и Свет еси́, и Воскресе́ние.

Богородичен: Веселя́тся о Тебе́, Де́во Пречи́стая, ро́да на́шего пра́отцы, Еде́м восприе́мше Тобо́ю, его́же преступле́нием погуби́ша: Ты бо, Чи́стая, и пре́жде Рождества́, и по Рождестве́ еси́.

Кондак, глас 1.

Воскре́сл еси́, я́ко Бог, из гро́ба во сла́ве, и мир совоскреси́л еси́; и естество́ челове́ческое я́ко Бо́га воспева́ет Тя, и смерть исчезе́; Ада́м же лику́ет, Влады́ко; Е́ва ны́не от уз избавля́ема ра́дуется, зову́щи: Ты еси́, И́же всем подая́, Христе́, воскресе́ние.

Икос:

Воскре́сшаго тридне́вно воспои́м я́ко Бо́га Всеси́льна, и врата́ а́дова сте́ршаго, и я́же от ве́ка из гро́ба воздви́гшаго, мvроно́сицам я́вльшагося, я́коже благоизво́лил есть, пре́жде сим е́же ра́дуйтеся, реки́й: и апо́столом ра́дость возвеща́я, я́ко Еди́н Жизнода́вец. Те́мже ве́рою жены́ ученико́м зна́мения побе́ды благовеству́ют, и ад стене́т, и смерть рыда́ет: мiр же весели́тся, и вси с ним ра́дуются. Ты бо по́дал еси́, Христе́, всем Воскресе́ние.

Песнь 7.

Ирмос: Тебе́ у́мную, Богоро́дице, пещь разсмотря́ем, ве́рнии, я́коже бо о́троки спасе́ три Превозноси́мый, мир обнови́, во чре́ве Твое́м всеце́л, хва́льный отце́в Бог и препросла́влен.

Убоя́ся земля́, сокры́ся со́лнце, и поме́рче свет, раздра́ся церко́вная боже́ственная заве́са, ка́мение же разсе́деся: на кресте́ бо ви́сит Пра́ведный, Хва́льный отце́в Бог, и препросла́влен.

Ты быв а́ки безпомо́щен, и уя́звен в ме́ртвых во́лею нас ра́ди превозноси́мый, вся свободи́л еси́, и держа́вною руко́ю совоскреси́л еси́, хва́льный отце́в Бог, и препросла́влен.

Богородичен: Ра́дуйся, исто́чниче присноживы́я воды́. Ра́дуйся, раю́ пи́щный. Ра́дуйся, стено́ ве́рных. Ра́дуйся, Неискусобра́чная. Ра́дуйся, всемíрная Ра́досте, Е́юже нам возсия́ Хва́льный отце́в Бог, и препросла́влен.

Песнь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся дела́ Госпо́дня, Го́спода, по́йте и превозноси́те во вся ве́ки.

И́же во́лею вся творя́й, и претворя́яй, обраща́яй сень сме́ртную в ве́чную жизнь, стра́стию Твое́ю, Сло́ве Бо́жий, Тебе́ непреста́нно вся дела́ Госпо́дня, Го́спода пои́м, и превозно́сим во вся ве́ки.

Ты разори́л еси́ сокруше́ние, Христе́, и окая́нство, во врате́х и тверды́нях а́довых, воскре́с из гро́ба тридне́вен. Тебе́ непреста́нно вся дела́, я́ко Го́спода, пою́т, и превозно́сят во вся ве́ки.

Богородичен: Я́же без се́мене и преесте́ственне от облиста́ния Боже́ственнаго / Ро́ждшую би́сера многоце́ннаго Христа́, воспои́м глаго́люще: благослови́те вся дела́ Госпо́дня, Го́спода, по́йте и превозноси́те Его́ во вся ве́ки.

Песнь 9.

Ирмос: О́браз чи́стаго рождества́ Твоего́, огнепали́мая купина́ показа́ неопа́льная; и ны́не на нас напа́стей свире́пеющую угаси́ти, мо́лимся, пещь, / да Тя, Богоро́дице, непреста́нно велича́ем.

О ка́ко, лю́дие беззако́ннии и непокори́вии, лука́вая совеща́вше, го́рдаго и нечести́ваго оправди́ша: Пра́веднаго же на дре́ве осуди́ша Го́спода сла́вы, Его́же досто́йно велича́ем!

Спа́се А́гнче Непоро́чне, И́же мíра грехи́ взе́мый, Тебе́ сла́вим воскре́сшаго тридне́вно, со Отце́м и Боже́ственным Твои́м Ду́хом, и Го́спода сла́вы: Его́же богосло́вяще, велича́ем.

Богородичен: Спаси́ лю́ди Твоя́, Го́споди, и́хже стяжа́л еси́ честно́ю Твое́ю кро́вию, це́рквам Твои́м подая́ мир, Человеколю́бче, Богоро́дицы моли́твами.

Стихиры воскресны, глас 1.

Вече́рния на́ша моли́твы приими́, Святы́й Го́споди, и пода́ждь нам оставле́ние грехо́в, я́ко Еди́н еси́ явле́й в ми́ре Воскресе́ние.

Обыди́те лю́дие Сио́н, и обыми́те его́, и дади́те сла́ву в нем Воскре́сшему из ме́ртвых: я́ко Той есть Бог наш, избавле́й нас от беззако́ний на́ших.

Прииди́те лю́дие, воспои́м, и поклони́мся Христу́, сла́вяще Его́ из ме́ртвых Воскресе́ние: я́ко Той есть Бог наш, от пре́лести вра́жия мiр избавле́й.

Слава, и ныне, Богородичен: Всемирную сла́ву, от челове́к Прозя́бшую, и Влады́ку Ро́ждшую, Небе́сную Дверь, воспои́м Мари́ю Де́ву, Безпло́тных песнь, и ве́рных удобре́ние: Сия́ бо яви́ся Не́бо, и Храм Божества́: Сия́ прегражде́ние вражды́ разруши́вши, мир введе́, и Ца́рствие отве́рзе. Сию́ у́бо иму́ще ве́ры Утвержде́ние, Побо́рника и́мамы из Нея́ Ро́ждшагося Го́спода. Дерза́йте у́бо, дерза́йте лю́дие Бо́жии: и́бо Той победи́т враги́, я́ко Всеси́лен.

Молитва

Влады́ко Вседержи́телю, Непостижи́ме, нача́ло све́та и преу́мная си́ло, и́же Ипоста́сного Сло́ва Оте́ц и еди́носильнаго Твоего́ Ду́ха испусти́тель: милосе́рдныя ра́ди ми́лости и неизрече́нныя бла́гости не презре́вый челове́ческого естества́, тмо́ю греха́ содержи́мого, но Боже́ственными све́ты свяще́нных Твои́х уче́ний, зако́ном и проро́ки свети́вый ми́ру, последи́ же нам того́ единоро́дного Твоего́ Сы́на Благоволи́вый пло́тию возсия́ти и ко осия́нию нас Твоего́ просвеще́ния наста́вити: да бу́дут уши Твои́ вне́млюще гла́су моле́ния на́шего, и да́руй нам, Бо́же, во бде́нном и тре́звенном се́рдце, всю настоя́щего жития нощь прейти́, ожида́ющым прише́ствия Сы́на Твоего́ и Бо́га нашего, судии́ всех, да не возлежа́ще и спя́ще, но бо́дрствующе и воздви́жени в де́лание за́поведей Твои́х обря́щемся и в ра́дость Его́ совни́дем, иде́же пра́знующих глас непреста́нный, и неизрече́нная сла́дость зря́щих Твоего́ лица́ добро́ту неизглаго́ланную. Яко Благ и Человеколю́бец Бог еси́, и Тебе́ славу возсыла́ем, Отцу и Сыну и Свято́му Ду́ху, ныне и при́сно, и во ве́ки веко́в, ами́нь.

См. также:

  1. Толкования тропарей воскресных
  2. Тропари праздникам

Глас 1 • Глас 2 • Глас 3 • Глас 4 • Глас 5 • Глас 6 • Глас 7 • Глас 8

Тропарь, глас 1:

Ка́мени запеча́тану от иуде́й / и во́ином стрегу́щим Пречи́стое Те́ло Твое́, / воскре́сл еси́ тридне́вный, Спа́се, / да́руяй ми́рови жи́знь. / Сего́ ра́ди си́лы небе́сныя вопия́ху Ти́, Жизнода́вче: / сла́ва воскресе́нию Твоему́, Христе́, / сла́ва Ца́рствию Твоему́, / сла́ва смотре́нию Твоему́, еди́не Человеколю́бче.

Перевод: Хотя камень был опечатан иудеями, и воины стерегли пречистое тело Твое, воскрес Ты в третий день, Спаситель, даруя миру жизнь. Потому Силы небесные взывали к Тебе, Податель жизни: «Слава воскресению Твоему, Христе; слава Царству Твоему; слава промыслу Твоему, Единый Человеколюбец!»

1. 2.

Тропарь 1-го гласа говорит о том, что даже суровая стража у гроба Господня не помешала Иисусу Христу воскреснуть из мертвых на третий день, даруя жизнь миру. Поэтому Силы Небесные прославляют Господа-Человеколюбца.

1. Мужской голос. 2. Женский голос.

Кондак

Воскре́сл еси́ я́ко Бо́г из гро́ба во сла́ве, / и ми́р совоскреси́л еси́; / и естество́ челове́ческое я́ко Бо́га воспева́ет Тя́, и сме́рть исчезе́; / Ада́м же лику́ет, Влады́ко; / Е́ва ны́не от у́з избавля́ема ра́дуется, зову́щи: / Ты́ еси́, И́же все́м подая́, Христе́, воскресе́ние.

1. 2.

Кондак 1-го гласа говорит о Воскресении Иисуса Христа из гроба и исчезновении смерти, чему радуется все человечество вместе с Адамом и Евой.

Тропарь, глас 2:

Егда́ снизше́л еси́ к сме́рти, Животе́ Безсме́ртный, / тогда́ а́д умертви́л еси́ блиста́нием Божества́: / егда́ же и уме́ршия от преиспо́дних воскреси́л еси́, / вся́ си́лы небе́сныя взыва́ху: / Жизнода́вче, Христе́ Бо́же на́ш, сла́ва Тебе́.

Перевод: Когда сошел Ты к смерти, Жизнь бессмертная, тогда ад умертвил Ты сиянием Божества. Когда же Ты и умерших из преисподней воскресил, все Силы Небесные взывали: «Податель жизни, Христе Боже наш, слава Тебе!»

1. 2.

В тропаре 2-го гласа говорится о том, что Иисус Христос сошел в ад, разрушил его и освободил оттуда ветхозаветных праведников.

Воскре́сл еси́ от гро́ба, Всеси́льне Спа́се, / и а́д ви́дев чу́до, ужасе́ся, / и ме́ртвии воста́ша; / тва́рь же ви́дящи сра́дуется Тебе́, / и Ада́м свесели́тся, / и ми́р, Спа́се мо́й, воспева́ет Тя́ при́сно.

1. 2.

В кондаке 2-го гласа говорится о том, что ад ужаснулся чуду Воскресения Спасителя и, видя это, весь мир непрестанно славит Господа.

Тропарь, глас 3:

Да веселя́тся небе́сная, / да ра́дуются земна́я, / я́ко сотвори́ держа́ву / мы́шцею Свое́ю Госпо́дь, / попра́ сме́ртию сме́рть, / пе́рвенец ме́ртвых бы́сть; / из чре́ва а́дова изба́ви на́с, / и подаде́ ми́рови ве́лию ми́лость.

Перевод: Да веселится все небесное, да радуется все земное, ибо явил могущество руки Своей Господь: попрал смертию смерть, сделался первенцем из мертвых, из чрева ада избавил нас и даровал миру великую милость.

1. 2.

Тропарь 3-го гласа воспевает Спасителя, как поправшего Своим Воскресением смерть, первенца из мертвых, и содержит призыв к молящимся радоваться и веселиться всем миром.

Воскре́сл еси́ дне́сь из гро́ба, Ще́дре, / и на́с возве́л еси́ от вра́т сме́ртных; / дне́сь Ада́м лику́ет, и ра́дуется Е́ва, / вку́пе же и проро́цы с патриа́рхи воспева́ют непреста́нно / Боже́ственную держа́ву вла́сти Твоея́.

Перевод: Воскрес Ты в сей день из гроба, Милосердный / и вывел нас из врат смерти. / В сей день Адам ликует и радуется Ева, / а вместе с ними и пророки с патриархами воспевают непрестанно / божественную мощь власти Твоей.

1. 2.

Кондак 3-го гласа воспевает Милостивого Господа, выведшего Своим Воскресением нас из врат смерти.

Тропарь, глас 4:

Све́тлую воскресе́ния про́поведь / от А́нгела уве́деша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся сме́рть, / воскре́се Христо́с Бо́г, / да́руяй ми́рови ве́лию ми́лость.

Перевод: Радостную весть о воскресении узнав от Ангела, и избавившись от прародительского осуждения, Господни ученицы апостолам возглашали, торжествуя: «Низвержена смерть, воскрес Христос Бог, дарующий миру великую милость!»

1. 2.

Тропарь 4 гласа упоминает жен-мироносиц, которые первыми из смертных узнали о чуде Воскресения и сообщили о нем апостолам.

Спа́с и Изба́витель мо́й / из гро́ба, я́ко Бо́г, / воскреси́ от у́з земноро́дныя, / и врата́ а́дова сокруши́, / и я́ко Влады́ка воскре́се тридне́вен.

Перевод: Спаситель и Избавитель мой от гроба, / как Бог воскресил из оков на земле рожденных, / и врата ада сокрушил, / и как Владыка воскрес на третий день.

1. 2.

В кондаке 4-го гласа поется о Спасителе, освободившем человечество от оков, сокрушившем врата ада и воскресшем на третий день.

Тропарь, глас 5:

Собезнача́льное Сло́во Отцу́ и Ду́хови, / от Де́вы ро́ждшееся на спасе́ние на́ше, / воспои́м, ве́рнии, и поклони́мся, / я́ко благоволи́ пло́тию взы́ти на кре́ст, / и сме́рть претерпе́ти, / и воскреси́ти уме́ршия / сла́вным воскресе́нием Свои́м.

Перевод: Слово, безначальное подобно Отцу и Духу, от Девы родившееся для спасения нашего, воспоем, верные, и поклонимся Ему, ибо благоволил Он плотию взойти на Крест, и смерть претерпеть, и воскресить умерших славным воскресением Своим.

1. 2.

Тропарь 5-го гласа предлагает православным христианам восхвалить Иисуса Христа, добровольно взошедшего на Крест ради нашего спасения.

Ко а́ду, Спа́се мо́й, соше́л еси́, / и врата́ сокруши́вый я́ко Всеси́лен, / уме́рших я́ко Созда́тель совоскреси́л еси́, / и сме́рти жа́ло сокруши́л еси́, / и Ада́м от кля́твы изба́влен бы́сть, / Человеколю́бче, те́мже вси́ зове́м: / спаси́ на́с, Го́споди.

1. 2.

В кондаке 5-го гласа повествуется о сошествии Спасителя в ад, уничтожении Им жала смерти и избавлении Адама от проклятия.

Тропарь, глас 6:

А́нгельския си́лы на гро́бе Твое́м, / и стрегу́щии омертве́ша, / и стоя́ше Мари́я во гро́бе, / и́щущи Пречи́стаго Те́ла Твоего́. / Плени́л еси́ а́д, не искуси́вся от него́; / сре́тил еси́ Де́ву, да́руяй живо́т. / Воскресы́й из ме́ртвых. Го́споди, сла́ва Тебе́.

Перевод: Ангельские Силы – при гробе Твоем, и охранявшие его омертвели, а Мария стояла в гробнице и искала пречистое тело Твое. Ты опустошил ад, не потерпев от него, Ты встретил Деву, дарующий жизнь. Воскресший из мертвых, Господи, слава Тебе!

1. 2.

В тропаре 6-го гласа поется об оцепенении стражников, охранявших гроб и увидевших явление Ангелов, и об ученице Христовой — Марии Магдалине, которая пришла искать мертвое тело Господа и не нашла его.

Живонача́льною дла́нию / уме́ршия от мра́чных удо́лий, / Жизнода́вец, воскреси́в все́х Христо́с Бо́г, / воскресе́ние подаде́ челове́ческому ро́ду: / е́сть бо все́х Спаси́тель, / воскресе́ние и живо́т, и Бо́г все́х.

Перевод: Живоначальною Своею дланию / из мрачных глубин всех умерших воскресив, / Податель жизни Христос Бог, / воскресение даровал человеческой природе, / ибо Он – Спаситель всех, воскресение и жизнь / и Бог всего!

1. 2.

Кондак 6-го гласа восхваляет Подателя жизни Христа Бога, даровавшего воскресение всему роду человеческому.

Тропарь, глас 7:

Разруши́л еси́ Кресто́м Твои́м сме́рть, / отве́рзл еси́ разбо́йнику ра́й, / мироно́сицам пла́ч преложи́л еси́, / и апо́столом пропове́дати повеле́л еси́, / я́ко воскре́сл еси́, Христе́ Бо́же, / да́руяй ми́рови / ве́лию ми́лость.

Перевод: Сокрушил Ты Крестом Своим смерть, открыл разбойнику рай, плач мироносиц в радость изменил и Своим апостолам проповедовать повелел, что Ты воскрес, Христе Боже, даруя миру великую милость.

1. 2.

В тропаре 7-го гласа говорится о том, что Господь сокрушил Своим Крестом смерть, открыл разбойнику рай, направил апостолов на проповедь, даруя миру великую милость.

Не ктому́ держа́ва сме́ртная / возмо́жет держа́ти челове́ки: / Христо́с бо сни́де, сокруша́я и разоря́я си́лы ея́; / связу́емь быва́ет а́д, / проро́цы согла́сно ра́дуются, / предста́, глаго́люще, Спа́с су́щим в ве́ре: / изыди́те, ве́рнии, в воскресе́ние.

Перевод: Уже не сможет более удерживать людей власть смерти, / ибо сошел Христос сокрушая и разоряя силы ее. / Ад связан, пророки согласно радуются: / «Явился, – говорят, – Спаситель тем, кто в вере; / выходите, верные для воскресения!»

1. 2.

В кондаке 7-го гласа говорится о том, что смерть больше не властна над людьми, потому что Иисус Христос уничтожил ее.

Тропарь, глас 8:

С высоты́ снизше́л еси́, Благоутро́бне, / погребе́ние прия́л еси́ тридне́вное, / да на́с свободи́ши страсте́й, / Животе́ и воскресе́ние на́ше. Го́споди, сла́ва Тебе́.

Перевод: С высоты сошел Ты, милосердный, благоволил пребыть три дня во гробе, чтобы нас освободить от страстей, – жизнь и воскресение наше, Господи, слава Тебе!

1. 2.

Тропарь 8-го гласа повествует о земном воплощении Сына Божия и Его трехдневном пребывании во гробе ради спасения человечества.

Воскре́с из гро́ба, уме́ршия воздви́гл еси́, / и Ада́ма воскреси́л еси́, / и Е́ва лику́ет во Твое́м воскресе́нии, / и мирсти́и концы́ торжеству́ют / е́же из ме́ртвых воста́нием Твои́м, Многоми́лостиве.

Перевод: Восстав из гроба, умерших Ты воздвиг, / и Адама воскресил, / и Ева ликует о Твоем воскресении, / и пределы мира торжествуют / о Твоем восстании из мертвых, Многомилостивый.

Октоих, глас 1. В четверг на утрени. Ирмосы. Песнь 1.

Твоя́ победи́тельная десни́ца / Боголе́пно в кре́пости просла́вися: / та́ бо, Безсме́ртне, / я́ко всемогу́щая проти́вныя сотре́, // изра́ильтяном пу́ть глубины́ новосоде́лавшая.

Песнь 3.

Еди́не, ве́дый челове́ческаго существа́ не́мощь / и ми́лостивно в не́ вообра́жся, / препоя́ши мя́ с высоты́ си́лою, / е́же вопи́ти Тебе́ Святы́й, // одушевле́нный хра́ме неизрече́нныя сла́вы Твоея́ Человеколю́бче.

Песнь 4.

Го́ру Тя́, благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву провозглаша́ше Свято́му, // во спасе́ние на́ше и обновле́ние.

Песнь 5.

Просвети́вый сия́нием / прише́ствия Твоего́, Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ Богоразу́мия, // правосла́вно пою́щих Тя́.

Песнь 6.

Обы́де на́с после́дняя бе́здна, / не́сть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же на́ш, // Ты́ бо кре́пость немощству́ющих и исправле́ние.

Песнь 7.

Тебе́, у́мную, Богоро́дице, пе́щь / разсмотря́ем, ве́рнии, / я́коже бо о́троки спасе́ три́ Превозноси́мый, / ми́р обнови́, во чре́ве Твое́м всеце́л, // хва́льный отце́в Бо́г, и препросла́влен.

Песнь 8.

В пещи́ о́троцы Изра́илевы, / я́коже в горни́ле, / добро́тою благоче́стия чисте́е зла́та блеща́хуся, глаго́люще: / благослови́те вся́ дела́ Госпо́дня, Го́спода, // по́йте и превозноси́те во вся́ ве́ки.

Песнь 9.

Образ чи́стаго рождества́ Твоего́ / огнепали́мая купина́ показа́ неопа́льная; / и ны́не на на́с напа́стей свире́пеющую угаси́ти, мо́лимся, пе́щь, / да Тя, Богоро́дице, // непреста́нно велича́ем.

Октоих, глас 1.

В четверг на утрени.

На стиховне, глас 1.

Апо́столи сла́внии, / просвети́вше вселе́нную, / при́сно Бо́га моли́те, // спасти́ся душа́м на́шим.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́, / и наста́ви сы́ны их.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Весели́теся му́ченицы о Го́споде, / я́ко по́двигом до́брым подвиза́стеся, / проти́вистеся царе́м, и мучи́телей победи́сте, / огня́ и меча́ не устраши́стеся, / и звере́й ди́виих снеда́ющих телеса́ ва́ша, / Христу́ со Ангелы пе́снь возсыла́юще, / с Небесе́ венцы́ прия́сте, / проси́те дарова́ти ми́ру ми́р, // и душа́м на́шим ве́лию ми́лость.

Сла́ва и ны́не, глас то́йже:

Ра́дуйся Богоро́дице Де́во, / ра́дуйся похвало́ всея́ вселе́нныя, // ра́дуйся Пречи́стая Ма́ти Бо́жия Благослове́нная.

Октоих, глас 1.

В четверг вечера.

На Господи воззвах, глас 1.

На Кресте́ пречи́стеи ру́це Твои́ / просте́рл еси́ Христе́, / от Тебе́ дале́че бы́вшия призыва́я, / и бли́з Тебе́ устроя́я. / Те́мже молю́ся Ти́: / плене́на мя́ бы́вша страстьми́ собери́, / и покая́ние ми́ да́руй, // вся́ку скве́рну страстну́ю очища́ющее.

Дла́ни пречи́стыя Твоя́ Христе́, / на Дре́ве возне́сл, / и Твоя́ пе́рсты окровави́л еси́, / хотя́ изба́вити Боже́ственных ру́к Твои́х де́ло, Человеколю́бче, / Ада́ма, преступле́нием держи́ма в ца́рствиих сме́ртных: // его́же воздви́гл еси́ вла́стию Твое́ю Всеси́льне.

Претерпе́л еси́ пострада́ти на́с ра́ди Спа́се, / и́же естество́м непрело́жен, и безстра́стный Божество́м, / распина́ешися Безнача́льне со злоде́и, / Ты́ Безгре́шне Христе́: / и со́лнце не терпя́ дерзнове́ния помрачи́ся, / и земля́ вся́ тряса́шеся, // Творца́ Тя ми́ру позна́вши.

Октоих, глас 1.

В четверг вечера.

На стиховне, глас 1.

Крест водрузи́ся на ло́бнем, / и процвете́ на́м безсме́ртие, // от исто́чника приснотеку́щаго ребра́ Спа́сова.

Стих: К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, / до́ндеже уще́дрит ны.

Неразруше́на стена́ на́м е́сть Честны́й Крест Спа́сов: / на него́ бо наде́ющеся, // спаса́емся вси́.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих: / и уничиже́ния го́рдых.

Моли́твами Го́споди все́х святы́х, и Богоро́дицы, / Тво́й ми́р да́ждь на́м, // и поми́луй на́с я́ко Еди́н Ще́др.

Сла́ва и ны́не, глас то́йже:

Заколе́ние Твое́ непра́ведное Христе́, / Де́ва зря́щи, пла́чущи вопия́ше Ти́: / Ча́до сладча́йшее, / ка́ко без пра́вды стра́ждеши? / и ка́ко на дре́ве ви́сиши, / и́же всю́ зе́млю пове́сивый на вода́х? / не оста́ви Мене́ Еди́ну, Благоде́телю Многоми́лостиве, // Ма́терь и Рабу́ Твою́, молю́ся.

Октоих, глас 1.

В пяток утра. Ирмосы, глас 1.

Песнь 1.

Помо́гшему Бо́гу во Еги́пте Моисе́ови, / и те́м фарао́на со всево́инством погрузи́вшему, // побе́дную пе́снь пои́м, я́ко просла́вися.

Песнь 3.

Да утверди́тся се́рдце мое́ в во́ли Твое́й, Христе́ Бо́же, / Иже над вода́ми Не́бо утвержде́й второ́е, // и основа́вый на вода́х зе́млю Всеси́льне.

Песнь 4.

Услы́шах Го́споди слу́х Тво́й, и убоя́хся: / разуме́х дела́ Твоя́, – проро́к глаго́лаше, – // и просла́вих си́лу Твою́.

Песнь 5.

Све́тлый на́м возсия́й Све́т Присносу́щный, / у́тренюющим о судьба́х за́поведей Твои́х, // Влады́ко Человеколю́бче Христе́ Бо́же на́ш.

Песнь 6.

Проро́ка спа́сл еси́ от ки́та, Человеколю́бче, / и мене́ из глубины́ прегреше́ний // возведи́, молю́ся.

Песнь 7.

Пе́щь, Спа́се, ороша́шеся, / о́троцы же, лику́юще, поя́ху: // отце́в Бо́же благослове́н еси́.

Песнь 8.

Песносло́вцы в пещи́ спа́сшаго де́ти / и громопла́менную прело́жшаго на ро́су, // Христа́ Бо́га по́йте и превозноси́те во вся́ ве́ки.

Песнь 9.

Тя́, ю́же ви́де Моисе́й неопали́мую купину́, / и ле́ствицу одушевле́нную, / ю́же Иа́ков ви́де, / и две́рь Небе́сную, е́юже про́йде Христо́с Бо́г на́ш, // пе́сньми Ма́ти Чи́стая велича́ем.

Октоих, глас 1.

В пяток утра.

На стиховне, глас 1.

Тебе́ на дре́ве пригво́ждшагося пло́тию, / и живо́т на́м пода́вшаго, // я́ко Спа́са и Влады́ку, пои́м непреста́нно.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́, / и наста́ви сы́ны их.

Твои́м Кресто́м Христе́, / еди́но ста́до бы́сть Ангелов и челове́ков, / и во еди́ном собо́ре Не́бо и земля́ весели́тся: // Го́споди сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Страстоте́рпцы Христо́вы прииди́те лю́дие вси́ почти́м / пе́ньми и пе́сньми духо́вными, / свети́льники ми́ра, и пропове́дники ве́ры, / исто́чники приснотеку́щия, / из ни́хже истека́ют ве́рным исцеле́ния. / Те́х моли́твами Христе́ Бо́же на́ш, / ми́р да́руй ми́ру Твоему́, // и душа́м на́шим ве́лию ми́лость.

Сла́ва и ны́не, глас то́йже:

Агнца, Агница и Всенепоро́чная Влады́чица, / на Кресте́ я́ко ви́девши / зра́ка не иму́ща, ни добро́ты, / увы́ Мне́, пла́чущи глаго́лаше: / где́ добро́та Твоя́ за́йде Сладча́йший? / где́ благоле́пие? / где́ благода́ть сия́ющая, о́браза Твоего́, // Сы́не Мо́й любе́знейший?

Октоих, глас 1.

В пяток вечера.

На Господи воззвах, глас 1.

Му́чеников еди́нственное торжество́, / струя́ми свои́х крове́й / мно́жество бесо́в удави́ша, / и вся́кия уста́виша сту́дныя же́ртвы, / и́дольскую разруши́ша пре́лесть, / терпели́вно пострада́вше. / И ны́не мо́лятся Христу, // дарова́ти душа́м на́шим ми́р и ве́лию ми́лость.

Па́стырие всесвяще́ннии, / му́дрыми словесы́ и уче́нии все́х научи́ша / во Еди́нстве Божество́ Тро́ическое сла́вити, / Ли́ц слия́ния и разделе́ния, Боже́ственне убега́юще. / И ны́не мо́лятся, // дарова́ти душа́м на́шим ми́р, и ве́лию ми́лость.

Преподо́бных сосло́вие, / плотска́я хоте́ния успи́ша, и стремле́ния обузда́ша, / житие́ равноа́нгельное показа́вше. / те́мже и в жили́щах Небе́сных ны́не ликовству́ют, / Христу́ моля́щеся, // дарова́ти душа́м на́шим ми́р, и ве́лию ми́лость.

Октоих, глас 1.

В пяток вечера.

На Господи воззвах, и́ны стихи́ры му́ченичны, гла́с 1.

Моли́твами Го́споди, все́х святы́х и Богоро́дицы, / Тво́й ми́р да́ждь на́м, // и поми́луй на́с, я́ко Еди́н Ще́др.

Еже на суди́щи ва́ше испове́дание святи́и, / де́монов оплева́ си́лу, / и от пре́лести челове́ки свободи́. / Те́мже и глава́м усека́емым, взыва́сте: / да бу́дет Го́споди, же́ртва ду́ш на́ших благоприя́тна пред Тобо́ю, / я́ко Тебе́ возлюби́вше, // неради́хом о вре́менней жи́зни, Человеколю́бче.

О до́брыя ва́шея ку́пли святи́и! / Яко кро́ви да́сте, и Небеса́ насле́довасте, / и вре́менно искуси́вшеся, ве́чно ра́дуетеся. / Вои́стинну добра́ ва́ша ку́пля; / тле́нная бо оста́вльше, нетле́нная восприя́сте, / и со Ангелы ликовству́юще, // пое́те непреста́нно Тро́ицу Единосу́щную.

Стих: К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, / до́ндеже уще́дрит ны.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих: / и уничиже́ния го́рдых.

Сла́ва и ны́не, глас то́йже:

Всеми́рную сла́ву, / от челове́к прозя́бшую / и Влады́ку ро́ждшую, / Небе́сную две́рь воспои́м Мари́ю Де́ву, / безпло́тных пе́снь, и ве́рных удобре́ние. / Сия́ бо яви́ся Не́бо, и хра́м Божества́, / Сия́ прегражде́ние вражды́ разруши́вши, / ми́р введе́ и Ца́рствие отве́рзе; / Сию́ у́бо иму́ще ве́ры утвержде́ние, / Побо́рника и́мамы из Нея́ ро́ждшагося Го́спода. / Дерза́йте у́бо, дерза́йте лю́дие Бо́жии, / и́бо То́й победи́т враги́, // я́ко Всеси́лен.

Октоих, глас 1.

В пяток вечера.

На стиховне, глас 1.

Прехва́льнии му́ченицы, / ва́с ни земля́ потаи́ла е́сть, / Но Не́бо прия́т вы́, / и отверзо́шася ва́м ра́йския две́ри, и вну́трь бы́вше. / Дре́ва живо́тнаго наслажда́етеся: / Христу́ моли́теся, / дарова́ти душа́м на́шим // ми́р и ве́лию ми́лость.

Сти́х: Блаже́ни, я́же избра́л / и прия́л еси́ Го́споди.

Ме́ртвен:

Ка́я жите́йская сла́дость / пребыва́ет печа́ли неприча́стна? / Ка́я ли сла́ва стои́т на земли́ непрело́жна? / вся́ се́ни немощне́йша, / и вся́ со́ний преле́стнейша: / во еди́н ча́с вся́ сия́ сме́рть прие́млет. / Но во све́те Христе́ лица́ Твоего́, / и в наслажде́нии Твоея́ красоты́, я́же избра́л еси́, // упоко́й я́ко Человеколю́бец.

Сти́х: Ду́ши и́х / во благи́х водворя́тся.

Ме́ртвен:

Никто́же безгре́шен, / никто́же от челове́к бы́в, / то́кмо Ты́ Еди́не Безсме́ртне: / те́мже рабы́ Твоя́ я́ко Бо́г Ще́дрый, / во све́те со Ангельскими ликостоя́нии Твои́ми учини́, / благоутро́бием Твои́м, презира́я беззако́ния, // и подая́ и́м проще́ние.

Сла́ва и ны́не, глас тойже:

Вои́стинну па́че ума́ чу́дная Твоя́ вели́чия, / рождества́ Твоего́ Богоневе́сто, / я́же пропове́даша проро́цы вси́ вся́ Пресла́вная: / зача́тие и рождество́ Всепе́тая недомы́сленно // и несказа́нно, и́мже ми́р спа́сл е́сть, я́ко Милосе́рд.

Октоих, глас 1.

В субботу утра.

Катава́сия му́ченичного кано́на, гла́с 1:

Песнь 3.

Да утверди́тся се́рдце мое́ в во́ли Твое́й Христе́ Бо́же, / Иже над вода́ми Не́бо утвержде́й второ́е, // и основа́вый на вода́х зе́млю Всеси́льне.

Песнь 6.

Проро́ка Ио́ну подража́я вопию́: / живо́т мо́й, Бла́же, свободи́ из тли́, // и спаси́ мя, Спа́се ми́ра, зову́ща: сла́ва Тебе́.

Песнь 8.

Его́же ужаса́ются Ангели, и вся́ во́инства, / я́ко Творца́ и Го́спода, / по́йте свяще́нницы, просла́вите о́троцы, / благослови́те лю́дие, // и превозноси́те во вся́ ве́ки.

Песнь 9.

Живоприе́мный исто́чник приснотеку́щий, / светоно́сный свети́льник благода́ти, / хра́м одушевле́нный, се́нь пречи́стую, / Небесе́ и земли́ простра́ннейшую, // Богоро́дицу ве́рнии велича́ем.

Октоих, канон воскресен (и Богородичен), глас 1.

1) Твоя́ победи́тельная десни́ца / Боголе́пно в кре́пости просла́вися: / та́ бо Безсме́ртне, / я́ко всемогу́щая, проти́вныя сотре́, // изра́ильтяном пу́ть глубины́ новосоде́лавшая.

3) Еди́не ве́дый челове́ческаго существа́ не́мощь, / и ми́лостивно в не́ вообра́жся, / препоя́ши мя́ с высоты́ си́лою, / е́же вопи́ти Тебе́ Святы́й: // одушевле́нный хра́ме неизрече́нныя сла́вы Твоея́ Человеколю́бче.

4) Го́ру Тя́ благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву провозглаша́ше Свято́му, // во спасе́ние на́ше и обновле́ние.

5) Просвети́вый сия́нием / прише́ствия Твоего́ Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ Богоразу́мия, // правосла́вно пою́щих Тя́.

6) Обы́де на́с после́дняя бе́здна, / не́сть избавля́яй, / вмени́хомся я́ко о́вцы заколе́ния, / спаси́ лю́ди Твоя́, Бо́же на́ш: // Ты́ бо кре́пость немощству́ющих и исправле́ние.

7) Тебе́ у́мную Богоро́дице, пе́щь / разсмотря́ем ве́рнии: / я́коже бо о́троки спасе́ три́ Превозноси́мый, / ми́р обнови́ во чре́ве Твое́м всеце́л, // хва́льный отце́в Бо́г, и препросла́влен.

8) В пещи́ о́троцы Изра́илевы, / я́коже в горни́ле / добро́тою благоче́стия, чисте́е зла́та блеща́хуся, глаго́люще: / благослови́те вся́ дела́ Госпо́дня Го́спода, // по́йте и превозноси́те во вся́ ве́ки.

9) Образ чи́стаго рождества́ Твоего́, / огнепали́мая купина́ показа́ неопа́льная: / и ны́не на на́с напа́стей свире́пеющую угаси́ти мо́лимся пе́щь, // да Тя́ Богоро́дице непреста́нно велича́ем.

Октоих, глас 1. В субботу утра.

На хвали́тех, стихи́ры му́ченичны, гла́с 1:

Страстоте́рпцы Христо́вы, / прииди́те лю́дие вси́ почти́м, / пе́ньми и пе́сньми духо́вными, / просве́щники ми́ра, и пропове́дники ве́ры: / исто́чники приснотеку́щия, / от ни́хже истека́ют ве́рным исцеле́ния. / Те́х моли́твами Христе́ Бо́же на́ш, / ми́р ми́ру Твоему́ да́руй, // и душа́м на́шим ве́лию ми́лость.

Си́и во́ини, Царя́ Вели́каго, / проти́вишася повеле́нием мучи́телевым, / до́блественне неради́ша о му́ках, / и ле́сть всю́ попра́вше, / досто́йне венча́ни бы́ша, / про́сят от Спа́са ми́ра, // и душа́м на́шим ве́лия ми́лости.

Ва́с прехва́льнии му́ченицы, / ни ско́рбь, ни теснота́, ни гла́д, ни гоне́ние, / ниже́ ра́ны, ни я́рость звере́й, / ни ме́чь, ниже́ о́гнь претя́й / разлучи́ти от Бо́га возмого́ша: / любо́вию же па́че я́же к Нему́, / я́ко в чужди́х подви́гшеся телесе́х, / естество́ забы́вше, и сме́рть презре́сте. / Те́мже и досто́йно трудо́в ва́ших мзду́ прия́ли есте́, / Небе́сному Ца́рствию насле́дницы бы́вше: // Христу́ моли́теся о душа́х на́ших.

Весели́теся му́ченицы о Го́споде, / я́ко по́двигом до́брым подвиза́стеся, / и проти́вистеся царе́м, и мучи́тели победи́сте: / огня́ и меча́ не устраши́стеся, / и звере́й ди́виих снеда́ющих телеса́ ва́ша. / Христу́ со Ангелы пе́снь возсыла́юще, / с Небесе́ венцы́ прия́сте: / испроси́те дарова́ти ми́р ми́ру, // и душа́м на́шим ве́лию ми́лость.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́, / и наста́ви сы́ны их.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Октоих, глас 1.

В субботу утра.

На хвали́тех, гла́с 1:

Ме́ртвен:

Де́лом Спа́се мо́й явля́еши, / я́ко Ты́ еси́ все́х Воскресе́ние, / сло́вом Сло́ве Ла́заря от ме́ртвых возста́вил еси́. / Егда́ же ме́ртвии от гробо́в воскресо́ша, / и врата́ а́дова смято́шася: / тогда́ челове́ком сме́рть со́н явля́шеся. / Но Иже на спасе́ние Своего́ созда́ния, / а не на осужде́ние прише́дый, / и́хже избра́л еси́, // упоко́й я́ко Человеколю́бец.

Сла́ва и ны́не, глас тойже:

Ра́дуйся от на́с, Свята́я Богоро́дице Де́во / Чи́стый Сосу́де всея́ вселе́нныя: / Свеще́ неугаси́мая, / вмести́лище Невмести́маго, Хра́ме необори́мый. / Ра́дуйся, из Нея́же роди́ся Агнец Бо́жий, // взе́мляй грехи́ всего́ ми́ра.

Октоих, глас 1.

В субботу утра.

На стихо́вне, стихи́ры поко́йны, гла́с 1:

Тебе́ Спа́се мо́лимся, / Твоего́ сла́дкаго прича́стия преста́вльшихся сподо́би, / и всели́ во оби́телех преподо́бных со святы́ми Твои́ми, / и в Небе́сная жили́ща, благоутро́бием Твои́м // презря́ беззако́ния, и подая́ си́м поко́й.

Сти́х: Блаже́ни, я́же избра́л / и прия́л еси́ Го́споди.

Па́че ви́димых Твоя́ Спа́се обеща́ния, / я́же о́ко не ви́де, и у́хо не слы́ша, / и на се́рдце челове́ка никогда́же взы́де: / мо́лим Тя́, Влады́ко, / сла́дкаго Твоего́ прича́стия / получи́ти сподо́би, к Тебе́ преста́вльшияся, // и пода́ждь и́м ве́чную жи́знь.

Сти́х: Ду́ши и́х / во благи́х водворя́тся.

О Кресте́ Твое́м веселя́щеся. / о Кресте́ Твое́м наде́ющеся раби́ Твои́, / к Тебе́ преста́вишася Человеколю́бче: / и́мже ны́не избавле́ние те́х прегреше́ний, / Крест Тво́й да́руй, / и Кро́вь пролия́нную за мирски́й живо́т, / благосе́рдием Твои́м проща́я согреше́ния, // и просвеща́я све́том Лица́ Твоего́.

Сти́х: И па́мять и́х / в ро́д и ро́д.

Никто́же безгре́шен, / никто́же от челове́к бы́в, / то́кмо Ты́ Еди́не Безсме́ртне. / Те́мже рабы́ Твоя́, я́ко Бо́г Ще́дрый, / во све́те со Ангельскими ликостоя́нии Твои́ми учини́ / благоутро́бием Твои́м, презира́я беззако́ния, // и подая́ и́м проще́ние.

Сла́ва и ны́не, глас тойже:

Христа́ умоли́, Твое́ рожде́ние Ма́ти Де́во, / согреше́ний проще́ние дарова́ти рабо́м Твои́м, / Тебе́ Богоро́дицу пропове́давшим вои́стинну, / и сло́вом благочести́вым благослови́вшим, / и све́тлости святы́х и весе́лия сподо́би // во Ца́рствии Твое́м.

Добавить комментарий

Ваш адрес email не будет опубликован. Обязательные поля помечены *